கிராண்ட்பாஸ் துப்பாக்கிச் சூடு : ஒருவர் கைது !
கிராண்ட்பாஸ் பொலிஸ் பிரிவிற்குட்பட்ட மயானத்திற்கு அருகில் முச்சக்கர வண்டியில் பயணித்தவர் ஒருவர் சுட்டுக்கொல்லப்பட்ட சம்பவத்தில் துப்பாக்கிச் சூடு நடத்தியவர் என சந்தேகிக்கப்படும் சந்தேகநபர் ஒருவரை கொழும்பு குற்றத்தடுப்பு பிரிவினர் கைது செய்துள்ளனர்.
கடந்த ஒக்டோபர் 16ஆம் திகதி கிராண்ட்பாஸ், மாதம்பிட்டிய பகுதியில் முச்சக்கரவண்டியில் பயணித்த நபர் ஒருவர் காரில் வந்த இனந்தெரியாதவர்களால் சுட்டுக் கொல்லப்பட்டார்.
சம்பவத்தை அடுத்து கிராண்ட்பாஸ் பொலிஸாரும் கொழும்பு குற்றத்தடுப்பு பிரிவினரும் விசாரணைகளை ஆரம்பித்தனர்.
ஒக்டோபர் 28ஆம் திகதி, துப்பாக்கிச் சூட்டுக்கு பயன்படுத்தப்பட்ட காரின் சாரதி என அடையாளம் காணப்பட்ட புளூமெண்டலில் வசிக்கும் 35 வயதுடைய நபர் கிராண்ட்பாஸ் பொலிஸாரால் கைது செய்யப்பட்டார்.
கொழும்பு குற்றத்தடுப்பு பிரிவினரால் சேகரிக்கப்பட்ட மேலதிக தகவலின் பேரில், துப்பாக்கிச் சூடு நடத்தியவர் என சந்தேகிக்கப்படும் வத்தளை, ஹந்தல பிரதேசத்தைச் சேர்ந்த 31 வயதுடைய நபர் நேற்று (31) கைது செய்யப்பட்டுள்ளார்.
அவரிடம் இருந்து 2 செல்போன்கள் பறிமுதல் செய்யப்பட்டன.
சந்தேகநபர் வெளிநாடுகளில் போதைப்பொருள் கடத்தலில் ஈடுபட்டுள்ள ஒரு ஒழுங்கமைக்கப்பட்ட குற்றப் பிரமுகருடன் தொடர்பில் இருந்ததாகவும், இந்த நபரின் வழிகாட்டுதலின் கீழ் இந்த கொலை மேற்கொள்ளப்பட்டுள்ளதாகவும் விசாரணைகளில் தெரியவந்துள்ளது.
கிராண்ட்பாஸ் பொலிஸாரும் கொழும்பு குற்றத்தடுப்பு பிரிவினரும் தொடர்ந்து விசாரணைகளை மேற்கொண்டு வருகின்றனர்.
