சிங்கபுர வர்த்தகரின் வீட்டில் நடந்தவை கொலை, தற்கொலைகள் : பொலிஸாரின் விசாரணைகளில் அம்பலம் !
சிலாபம் – சிங்ஹபுர பகுதியில் பதிவாகிய ஒரே குடும்பத்தைச் சேர்ந்த கணவர், மனைவி மற்றும் மகள் ஆகியோரின் மரணம் தொடர்பான பிரேத பரிசோதனை அறிக்கை வெளியானது.
அதன்படி கணவரே தமது மனைவியையும் மகளையும் கொலை செய்துவிட்டு, தமக்குத் தாமே தீ வைத்துக்கொண்டு உயிரை மாய்த்துக் கொண்டதாக பிரேத பரிசோதனைகளில் தெரியவந்துள்ளது.
சிலாபம் – சிங்ஹபுர பகுதியில் தீக்கிரையான 2 மாடிகள் கொண்ட வீடொன்றிலிருந்து ஆண் ஒருவரும் இரண்டு பெண்களும் சடலங்களாக மீட்கப்பட்டனர்.
சிலாபம்-சிங்கபுர பிரதேசத்தைச் சேர்ந்த சேனாரத்ன (51 வயது) அவரது
மனைவி மஞ்சுளா நிரோஷனி பண்டார (44 வயது) மற்றும் 15 வயதுடைய அவர்களது மகள் நெத்மி நிமாஷா ஆகியோரே சம்பவத்தில் உயிழந்தனர்.
உயிரிழந்த சேனாரத்ன காணிகள் தொடர்பான தொழிலில் ஈடுபட்டு வந்தவர். மேலும் அவரது மனைவி மஞ்சுளா சிலாபம் பிரதேச செயலகத்தின் பொருளாதார அபிவிருத்தி உத்தியோகத்தராக முன்னேஸ்வரம் பிரதேசத்திற்கு பொறுப்பாக கடமையாற்றியுள்ளார்.
மகள் நெத்மி நிமேஷா சிலாபம் ஆனந்த தேசிய பாடசாலையில் 10ஆம் வகுப்பில் கல்வி பயின்று வந்துள்ளார்.
நேற்று முன்தினம் (20) காலை வீடு ஒன்று தீக்கிரையாகியுள்ளதாக சிலாபம் நகரசபையின் தீயணைப்பு பிரிவுக்கு தகவல் கிடைத்தது.
அதன்படி, தீயணைப்புப் பிரிவின் ஊழியர்கள், உடனடியாக சம்பந்தப்பட்ட இடத்திற்குச் சென்றனர், இரண்டு மாடி வீட்டின் கீழ் தளம் ஏற்கனவே தீப்பிடித்து எரிந்திருந்தது.
வீட்டின் கதவுகள் அனைத்தும் மூடப்பட்டு, கதவும் பூட்டப்பட்டிருந்ததால், வீட்டிற்குள் யாரும் இருப்பதாக வெளியில் இருந்து தெரியவில்லை.
தீயணைப்பு ஊழியர்கள் மற்றும் அயலவர்கள் இணைந்து தீயை கட்டுப்பாட்டுக்குள் கொண்டுவந்ததன் பின்னர், வீட்டின் கதவுகளை உடைத்து உள்ளே சென்றபோது வீட்டின் அறையொன்றிலும் மண்டபத்திலும் 3 எரிந்த சடலங்கள் இருந்ததைக் கண்டனர்.
சம்பவம் தொடர்பில் பொலிஸாருக்கு அறிவிக்கப்பட்டதையடுத்து விசாரணைகள் மேற்கொள்ளப்பட்டன.
உயிரிழந்தவர்கள் ஒரே குடும்பத்தை சேர்ந்த கணவன் மற்றும் மகள் என தெரியவந்துள்ளது.
பின்னர், சிலாபம் மேலதிக மாவட்ட நீதிபதியும் நீதவானுமான சசித டி சில்வா சம்பவ இடத்திற்கு வந்து முதற்கட்ட நீதவான் விசாரணைகளை மேற்கொண்டார்.
சிலாபம் பொது வைத்தியசாலையின் உதவி தடயவியல் வைத்திய அதிகாரி மற்றும் அரசாங்க பரிசோதகர் திணைக்கள அதிகாரிகளும் வந்து கண்காணிப்புப் பணிகளை மேற்கொண்டனர்.
பின்னர் உயிரிழந்தவர்களின் சடலம் பிரேத பரிசோதனைக்காக சிலாபம் பொது வைத்தியசாலைக்கு கொண்டு செல்லப்பட்டது.
சிலாபம் பொது வைத்தியசாலையின் விசேட சட்ட வைத்திய அதிகாரி ஐ.எம் இலங்கரத்ன இந்த பிரேத பரிசோதனையை மேற்கொண்டார்.
உயிரிழந்த மஞ்சுளா நிரோஷனியின் பிரேதப் பரிசோதனை முதலில் நடத்தப்பட்ட நிலையில், கழுத்தில் கூரிய ஆயுதத்தால் 6 முறை குத்திக்கொலை செய்யப்பட்டிருப்பது தெரியவந்துள்ளது. அவர் 18ஆம் திகதி இரவு இறந்திருக்கலாம் என்று தடயவியல் வைத்திய அதிகாரி கருத்து தெரிவித்துள்ளார். அதிக இரத்தப்போக்கு காரணமாக மரணம் நிகழ்ந்ததாகவும், மறுநாள் உடல் எரிக்கப்பட்டதாகவும் தெரிவித்துள்ளார்.
மகள் நெத்மி நிமேஷாவின் கழுத்தில் 2 வெட்டுக்காயங்கள் காணப்பட்டதை சட்ட வைத்திய அதிகாரி அவதானித்துள்ளதுடன், அவர் கடந்த 19ஆம் திகதி இரவு கொல்லப்பட்டிருக்கலாம் எனத் தெரிவித்தார்.
உயிரிழந்த சேனாரத்னவின் பிரேத பரிசோதனை நடைபெற்று வருகிறது.
உயிரிழந்த சேனாரத்ன காணிகளை சதி செய்து விற்பனை செய்யும் தொழிலில் ஈடுபட்டு வந்த நிலையில் பலரிடம் கடன் பெற்றுள்ளதாக பொலிஸாரின் விசாரணையில் தெரியவந்துள்ளது.
இதன் காரணமாக சிலாபம்-குருநாகல் வீதியில் கொக்கவில பிரதேசத்தில் தனது மனைவி மஞ்சுளா நிரோஷனிக்கு சொந்தமான 5 ஏக்கர் காணியை சதி செய்து விற்பனை செய்ய மனைவியையும் கேட்டுள்ளதாக பொலிஸார் தெரிவித்துள்ளனர். ஆனால் மனைவி இந்த திட்டத்திற்கு சம்மதிக்கவில்லை.
இந்த வீட்டில் இருந்த 25 இலட்சம் ரூபா பெறுமதியான நகைகள் சுமார் 2 மாதங்களுக்கு முன்னர் காணாமல் போயுள்ளதுடன் வெளியாட்கள் எவரும் வீட்டிற்குள் நுழையவில்லை என பொலிஸ் விசாரணையில் தெரியவந்துள்ளது.
மேலும் வீட்டில் எந்தவித பாதுகாப்பும் இன்றி நகைகள் கிடந்தது தெரியவந்துள்ளது.
இவ்விரு சம்பவங்கள் காரணமாக கணவன் மனைவிக்கு இடையில் அடிக்கடி தகராறு ஏற்பட்டு வந்ததாகவும் பொலிஸார் தெரிவித்தனர்.
குறித்த நபர்கள் தங்களது அயலவர்களுடன் எந்த உறவையும் பேணவில்லை. இதனால் வீட்டில் என்ன நடந்தது என்பது குறித்த பல விபரங்களை பொலிஸாரால் கண்டுபிடிக்க முடியவில்லை.
மனைவி மற்றும் மகளை கொன்றுவிட்டு, கணவன் தானும் உடலில் தீ வைத்துக்கொண்டு தற்கொலை செய்திருக்கலாம் என பொலிஸார் சந்தேகிக்கின்றனர்.
